SSC HSC Hall Ticket 2026 Update | दहावी आणि बारावीचं वर्ष म्हटलं की विद्यार्थ्यांसोबतच पालकांच्या मनातही एक वेगळीच धाकधूक असते. मुलांनी वर्षभर कितीही अभ्यास केला, तरी शेवटच्या काळात होणारी लगबग काही वेगळीच असते. आता हीच लगबग अधिक वाढणार आहे, कारण महाराष्ट्र राज्य माध्यमिक व उच्च माध्यमिक शिक्षण मंडळाने यंदाच्या प्रात्यक्षिक (Practical) आणि तोंडी परीक्षेचे अधिकृत वेळापत्रक जाहीर केले आहे. जर तुमचे मुल किंवा घरातील कोणी यंदा बोर्डाची परीक्षा देणार असेल, तर ही बातमी तुमच्यासाठी अत्यंत महत्त्वाची आहे. SSC HSC Hall Ticket 2026 Update
कधी सुरू होणार परीक्षा?
राज्यातील पुणे, मुंबई, नागपूर, नाशिक यांसह सर्व नऊ विभागीय मंडळांमार्फत ही परीक्षा घेतली जाणार आहे. बोर्डाचे सचिव डॉ. दीपक माळी यांनी दिलेल्या माहितीनुसार, बारावीच्या विद्यार्थ्यांची प्रात्यक्षिक परीक्षा २३ जानेवारी ते १८ फेब्रुवारी दरम्यान होणार आहे. तर दुसरीकडे, दहावीच्या चिमुकल्यांची परीक्षा २ फेब्रुवारी ते २८ फेब्रुवारी या कालावधीत पार पडेल. त्यामुळे आता खेळाचे दिवस संपले असून खऱ्या अर्थाने पुस्तकांशी मैत्री करण्याची वेळ आली आहे.
शाळा आणि कनिष्ठ महाविद्यालयांना सूचना
यंदा बोर्डाने पारदर्शकतेवर अधिक भर दिला आहे. विद्यार्थ्यांचे जे काही अंतर्गत गुण, श्रेणी किंवा तोंडी परीक्षेचे मार्क असतील, ते सर्व ऑनलाईन पद्धतीने भरले जाणार आहेत. या गुणांच्या यादीवर विषय शिक्षक, मुख्याध्यापक आणि प्राचार्यांची सही असणे अनिवार्य आहे. ही सर्व प्रक्रिया वेळेत पूर्ण करून गुणतक्ते सीलबंद पाकिटात विभागीय मंडळाकडे जमा करायचे आहेत. जेणेकरून निकालाच्या वेळी कोणत्याही विद्यार्थ्याचे नुकसान होणार नाही.
ज्यांचे नाव यादीत नाही, त्यांच्यासाठी काय?
अनेकदा काही विद्यार्थी उशिरा फॉर्म भरतात किंवा ऐनवेळी विषय बदलतात. अशा विद्यार्थ्यांचे बैठक क्रमांक ऑनलाईन सिस्टीममध्ये दिसत नसले, तरी घाबरण्याचे कारण नाही. अशा मुलांचे गुण जुन्या म्हणजेच प्रचलित पद्धतीने मंडळाकडे जमा करण्याच्या सूचना देण्यात आल्या आहेत. तसेच, जे विद्यार्थी काही कारणास्तव नियमित परीक्षेत बसू शकणार नाहीत, त्यांच्यासाठी ‘आऊट ऑफ टर्न’ परीक्षेची सोय देखील संबंधित शाळा आणि महाविद्यालयांतच करण्यात आली आहे.
शेवटी एकच सांगावसं वाटतं, परीक्षा ही फक्त कागदावरची नसते तर ती तुमच्या कष्टाची पावती असते. दहावी-बारावीच्या या प्रवासात गुणांपेक्षा तुमच्या जिद्दीला जास्त महत्त्व द्या. पालकांनीही मुलांवर जास्त दडपण न आणता त्यांना मानसिक पाठबळ दिलं, तर निकालाचा आनंद नक्कीच द्विगुणित होईल.